Bərdə, 27 may, Tahir Ağaməmmədov, AZƏRTAC

Gənclər və İdman Nazirliyinin təşkilatçılığı, Səhiyyə Nazirliyi və Mərkəzi Qan Bankının dəstəyi ilə 28 May - Müstəqillik Gününə həsr olunmuş “Qan ver, həyat xilas et!” şüarı altında könüllü qanvermə aksiyasına Bərdə gəncləri də qoşulublar.
AZƏRTAC-ın bölgə müxbiri xəbər verir ki, mayın 27-də Mərkəzi Qan Bankının Bərdə rayon bölməsində keçirilən qanvermə aksiyasında Gənclər və İdman İdarəsinin əməkdaşları, idmançılar, gənclər iştirak ediblər. Aksiyada iştirak edənlər əvvəlcə müayinədən keçib, onların sağlam olub-olmamaları müəyyənləşdirilib. Aksiyada 23 nəfər qan verib.
Elmi-Tədqiqat Hematologiya və Transfuziologiya İnstitutunun Mərkəzi Qan Bankının əməkdaşları tərəfindən toplanan qan ehtiyacı olan xəstələrin müalicəsində istifadə olunacaq.