RİNN-in nümayəndələri EaPeReg-in 21-ci plenar iclasında iştirak ediblər
Bakı, 26 may, AZƏRTAC
Mayın 24-də İrlandiyanın Dublin şəhərində Avropa İttifaqının “Şərq Tərəfdaşlığı ölkələrinin Elektron Rabitə Tənzimləyiciləri Şəbəkəsi”nin (EaPeReg) 21-ci plenar iclası keçirilib.
Rəqəmsal İnkişaf və Nəqliyyat Nazirliyindən (RİNN) AZƏRTAC-a bildirilib ki, iclasda 19 ölkənin telekommunikasiya sahəsində tənzimləyici qurumunun 50-dən çox nümayəndəsi iştirak edib. Tədbirdə Azərbaycanı Rəqəmsal İnkişaf və Nəqliyyat Nazirliyinin (RİNN) nümayəndəsi və Şəbəkənin nazirlik üzrə ümumi koordinatoru Sevinc Vəliyeva və İnformasiya Kommunikasiya Texnologiyaları Agentliyinin (İKTA) nümayəndəsi Ravil İsgəndərov təmsil ediblər.
İclasda EaPeReg-in builki sədri Gürcüstan (ComCom) və müavini İrlandiya (ComReg) təmsilçiləri tərəfindən 2023-cü ilin birinci yarısında görülən işlər barədə məlumat verilib. Həmçinin şəbəkənin hər üç işçi qrup rəhbərləri tərəfindən görülən fəaliyyətlə bağlı hesabatlar dinlənilib. Şəbəkənin İş Planı tədbir iştirakçılarının nəzərinə çatdırılıb.
Tədbirdə, eyni zamanda, Beynəlxalq Telekommunikasiya İttifaqı (BTİ), Avropa Elektron Rabitə Tənzimləyiciləri Şurası (BEREC), Avropa Aralıq dənizi Tənzimləyicilər Qrupu (EMERG), eləcə də Avropa Komissiyasının Radiotezlik Siyasəti Qrupunun (RSPG) rəhbər və təmsilçilərinin EaPeReg ilə aparılan əməkdaşlıq sahələrinə dair çıxışları olub.
RİNN-in nümayəndələri tərəfindən tədbir iştirakçılarına Azərbaycanda yaradılan və tənzimləyici funksiyaları yerinə yetirəcək İnformasiya Kommunikasiya Texnologiyaları Agentliyi barədə məlumat verilib. Azərbaycanın şəbəkə ilə əməkdaşlığı çərçivəsində bu ilin sentyabr ayında Bakıda əsas tənzimləyici məsələlərə dair tədbirin keçiriləcəyi diqqətə çatdırılıb.
Qeyd edilib ki, şəbəkə vasitəsilə “EU4Digital” layihəsinin 1-ci fazasında icra edilən tövsiyə sənədlərinin daha dərindən mənimsənilməsi üçün İKTA ilə əlavə görüşlərin keçirilməsi nəzərdə tutulur. Bununla bağlı “EU4Digital” komandası ilə razılıq əldə edilib.
İclasda, eyni zamanda, BEREC-EaPeReg ilə dördtərəfli sammitin planlaşdırılması müzakirə olunub. EaPeReg-in 2024-cü il üzrə sədrliyi üçün Moldovanın namizədliyi irəli sürülüb və iclas iştirakçıları tərəfindən dəstəklənib.
Sonda EaPeReg-in 22-ci plenar iclasının Gürcüstanda keçiriləcəyi qeyd olunub.
“Azərkosmos” gələn il fevralda keçiriləcək “Beynəlxalq Kosmik Konvensiya 2024”də iştirak edəcək
Ölkənin informasiya təhlükəsizliyi və kibertəhlükəsizliyə dair Strategiyası təsdiq olunub - SƏRƏNCAM
Azərbaycan “Digitalisation and Channel Awards 2023” mükafatlandırılma mərasimində təmsil olunacaq
“Google” şirkətinin Bakı konfransına 1000-dən çox müraciət qeydə alınıb