Tələbələrin Mərkəzi Elmi Kitabxanada istehsalat təcrübəsi yekunlaşıb
Bakı, 24 may, AZƏRTAC
2022-2023-cü tədris ilində bakalavriat pilləsinin sonuncu kursunda təhsil alan 34 tələbənin AMEA Mərkəzi Elmi Kitabxanasında (MEK) istehsalat təcrübəsi yekunlaşıb.
Bu barədə AZƏRTAC-a MEK-dən məlumat verilib. Bildirilib ki, Bakı Dövlət Universitetinin (BDU) İnformasiya və sənəd menecmenti, Azərbaycan Dillər Universitetinin (ADU) Filologiya, Beynəlxalq münasibətlər və Regionşünaslıq, Azərbaycan Universitetinin Mühasibat uçotu və audit və Maliyyə fakültələrinin tələbələri 3 aya yaxın müddətdə MEK-in müxtəlif şöbələrində təcrübə keçiblər. Onlar kitabxana işinin incəliklərinə dərindən yiyələnərək, bütün kitabxana proseslərinin icra olunmasında böyük həvəslə çalışıblar. Həmçinin tələbələr İRBİS 64 AKİS proqramına müxtəlif dildə və sayda ədəbiyyat nümunələri daxil ediblər.
MEK-in baş direktoru professor Məmməd Əliyev tələbələrin təcrübəli və hazırlıqlı kadr kimi formalaşmasında istehsalat təcrübəsinin müstəsna əhəmiyyətə malik olduğunu qeyd edib. O, tələbələrə qazanılan biliklərdən səmərəli istifadə etməyi tövsiyə edərək onlara uğurlar arzulayıb.
BDU-nun İnformasiya və sənəd menecmenti fakültəsi üzrə istehsalat təcrübəsi keçən tələbələrin elmi rəhbərlərindən Safura Hacıyeva yaradılan şəraiti yüksək qiymətləndirərək, göstərilən qayğı və diqqətə görə MEK rəhbərliyinə və kollektivinə təşəkkür edib. Təcrübənin yüksək səviyyədə təşkil edildiyini və yenidən əməkdaşlıq etmək arzusunda olduqlarını bildirib. Tələbələr də öz növbəsində burada qazandıqları təcrübənin faydasını vurğulayıblar.
Sonda istehsalat təcrübəsində göstərdiyi fəallığa görə bir qrup tələbəyə təşəkkürnamə təqdim edilib.
BDU-nun Qazax filialında inklüziv təhsilə dair beynəlxalq konfransın regional bölməsinin iclası olub
IV Azərbaycan Astronomiya Olimpiadasının final mərhələsi keçirilib
“Sabahın alimləri” müsabiqəsində Biləsuvar Təhsil Kompleksinin 6 şagirdi uğur qazanıb
“IT sahəsindəki yolum” mövzusunda təcrübə sessiyasının keçirilməsi planlaşdırılır