Bakı, 24 may, AZƏRTAC

VI “Azərbaycanım” Respublika Uşaq Rəsm Festivalı çərçivəsində elan olunan eyniadlı müsabiqənin yekun sərgisi açılacaq. Sərgi mayın 27-də Xətai Rayon İcra Hakimiyyətinin qarşısında təşkil ediləcək.
Bu barədə AZƏRTAC-a Xətai Sənət Mərkəzinin direktoru Zahid Əvəzov məlumat verib.
“Sərgi uşaq, yeniyetmə və gənclərin yaradıcılığını stimullaşdırmaq və bədii zövqünü inkişaf etdirilməsinə xidmət məqsədilə keçirilən festival çərçivəsində təşkil olunacaq. “Heydər Əliyev İli”nə həsr olunmuş müsabiqəyə şəhər və bölgələrimizin 500-dən çox məktəb və ya yaradıcılıq müəssisindən 2500-ə qədər uşaq, yeniyetmə və gənc 3000-dən çox əsər göndərib və sərgilənmək üçün 800-dən bir qədər çox əsər seçilib. Bu əsərlər növbəli olaraq Xətai Sənət Mərkəzinin sərgi zalında sərgilənib. Qaliblərə hər yaş qrupu üzrə ayrıca hədiyyə və diplomların təqdim olunması nəzərdə tutulur”, - deyə Z.Əvəzov qeyd edib.
Xatırladaq ki, müsabiqə Mədəniyyət Nazirliyi, Elm və Təhsil Nazirliyi, “Azərbaycan Televiziya və Radio Verilişləri” Qapalı Səhmdar Cəmiyyəti, Xətai Rayon İcra Hakimiyyəti, Azərbaycan Rəssamlar İttifaqı, Azərbaycan Dövlət Rəsm Qalereyası və Xətai Sənət Mərkəzinin birgə təşkilatçılığı təşkil edilib.