Bakı, 29 aprel, Göyçək Mahmudlu, AZƏRTAC

Azərbaycanda on milli park var və onların hər birində çox geniş xidmət potensialı mövcuddur. Həmin potensialı Azərbaycanın mikro və kiçik sahibkarlarına təqdim etmək niyyətindəyik. Bu gün Abşeron Milli Parkında keçirilən "İstehsal et, təbiətə zərər vermə" sərgi-satış yarmarkasının məqsədi də məhz budur.
AZƏRTAC xəbər verir ki, bunu parkın direktoru Etibar İbrahimov jurnalistlərə müsahibəsində deyib.
"Bu tədbir Azərbaycanın milli parkları ilə sahibkarların ilk təması idi. Ümid edirik ki, sərgi-satış yarmarkasından sonra yerli sahibkarlar, o cümlədən iş adamları milli parklarda olan potensialla maraqlanacaq və müxtəlif xidmət sferalarında öz layihələrini təklif edəcəklər. Belə tədbirlər davamlı olacaq və digər milli parklarda da həyata keçiriləcək. İnanırıq ki, Azərbaycandakı sahibkarlıq subyektlərini milli parklara cəlb etmək mümkün olacaq", - deyə E.İbrahimov bildirib.