“Azəripək” mövcud xammal ehtiyatı ilə növbəti barama mövsümünədək fasiləsiz işləyəcək
Qax, 28 aprel, Mustafa Dadaşov, AZƏRTAC
Keçən il respublikanın 40 rayonunda barama yetişdirilib, 341 tona yaxın yaş barama istehsal olunub. İstehsal olunan baramanın hamısı “Azəripək” MMC-nin mütəxəssisləri tərəfindən yerlərdə qəbul edilib və itkisiz müəssisəyə gətirilib. Tədarük edilən yaş baramadan müəssisədə 130 tonadək quru barama istehsal olunub. Hazırda həmin baramadan müəssisədə emal prosesində istifadə olunur.
Bu barədə AZƏRTAC-ın bölgə müxbirinə “Azəripək” MMC-nin sədrinin müşaviri Teymur Musayev Qax Damazlıq İpəkçilik Stansiyasında ipəkqurdu toxumunun inkubasiyası nəticəsində əldə olunan ipəkqurdularının kümçülərə paylanılması ilə bağlı keçirilən tədbirdə məlumat verib.
MMC-nin rəsmisi bildirib ki, ötən il müəssisədə 30 tona yaxın xam ipək istehsal olunub. Hazırda müəssisədə baramaaçan, boyaq-bəzək, toxucu istehsalatları, burucu və xalça sexləri fəaliyyət göstərir. Bu istehsalatlar mövcud xammal ehtiyatı ilə növbəti barama mövsümünədək fasiləsiz fəaliyyət göstərəcəklər.
Teymur Musayevin sözlərinə görə, builki mövsümdə Qax Damazlıq İpəkçilik Stansiyasında inkubasiya olunan ipəkqurdu toxumundan 320 tonadək yaş barama istehsal olunması gözlənilir. Ötən il olduğu kimi, bu il də kümçülərə istehsal etdikləri yaş baramanın hər kiloqramına görə “Azəripək” MMC tərəfindən 5 manat, dövlət tərəfindən subsidiya şəklində 6 manat olmaqla, ümumilikdə, 11 manat ödəniləcək.
Ağstafada Aqrar İnnovasiya Festivalı çərçivəsində toxum sərgi-satış yarmarkası təşkil olunub
Bu il Oğuzun taxıl sahələrində orta məhsuldarlıq 30,9 sentner olub
Balakənli fermerlər 7819 hektar sahədə dən üçün qarğıdalı yetişdiriblər
Bu il Beyləqanda 23 min tondan çox pambıq istehsalı gözlənilir
Qəhvəyi mərmər bağacığını aşkar etmək məqsədilə Şəkinin kəndlərində 100 feromon tələ asılıb