Bakı, 15 aprel, AZƏRTAC

Ekologiya və Təbii Sərvətlər Nazirliyinin (ETSN) rəsmi sosial şəbəkə hesablarında start verilmiş “Hövzələri sintetik torlardan birlikdə təmizləyək” layihəsi çərçivəsində vətəndaşlardan daxil olan koordinatlar əsasında sintetik torların yığışdırılması davam edir.
ETSN-in Ekoloji maarifləndirmə və kommunikasiya şöbəsinin müdiri Səyyarə Məmmədova AZƏRTAC-a bildirib ki, təkcə vətəndaşlardan daxil olan məlumatlar əsasında Dövlət Ekoloji Təhlükəsizlik Xidmətinin əməkdaşları tərəfindən Xəzər dənizinin Astara rayonu akvatoriyasından, Kür çayından, Qumyataq gölündən və digər daxili su hövzələrindən 3 min 74 metr uzunluğunda 49 ədəd sintetik tor yığışdırılıb.
S.Məmmədova bir daha təbiətsevər şəxsləri su hövzələrində rast gəldikləri sintetik torlar barədə nazirliyin rəsmi sosial şəbəkə hesablarına və ya teleqram qrupuna (https://t.me/+tb9ED95-my9iOTIy) dəqiq koordinatlar göstərilməklə məlumat verməyə çağırıb: “Geniş ictimaiyyətin dəstəyi ilə balıq ehtiyatlarının mühafizəsi işini möhkəmləndirmək məqsədilə başladılan layihəyə dəstək olan, fəallıq nümayiş etdirən və su hövzələrində rast gəldikləri sintetik torlar barədə nazirliyə məlumat verən bütün vətəndaşlara təşəkkür edir, onları hövzələrin mühafizəsində daha aktiv iştirak etməyə səsləyirik”.