Qax, 19 mart, Mustafa Dadaşov, AZƏRTAC

Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin elan etdiyi kiçik qrant müsabiqəsinin qalibi olan “Kənd yaşıl turizminin inkişafına dəstək” Ictimai Birliyi tərəfindən həyata keçirilən “Gənc qızlar arasında əl sənətkarlığının inkişafına yönəldilmiş təşəbbüslər” layihəsi çərçivəsində ilk təlimlər Qax rayonunda reallaşıb.
Bu barədə AZƏRTAC-ın bölgə müxbirinə Gənclərin İnkişaf və karyera Mərkəzinin (GİKM) Qax nümayəndəliyinin direktoru Elmir Həşimli məlumat verib.
Bildirilib ki, layihə çərçivəsində Qax rayon Heydər Əliyev Mərkəzində təşkil olunan təlimlərdə orta məktəb şagirdləri və Peşə liseyinin tələbələri olmaqla, 20-dək gənc qız iştirak edib. Ümumilikdə, 8 təlim keçirilib. Təlim iştirakçılarına əllə toxuma, qotazların hazırlanması, parça üzərində naxışların hazırlanması və əl sənətkarlığının digər növləri üzrə dərslər verilib. Təlimlər GİKM Qax nümayəndəliyinin dəstəyi ilə keçirilib.
Layihənin ikinci mərhələsinin apreldə Zaqatala rayonunda keçirilməsi nəzərdə tutulur.