Kommunikasiya, innovasiyalar və texnologiyalar sahələrini əhatə edən yarışmanın nəticələri martın 15-i Azərbaycan-Fransız Universitetində baş tutan təltifetmə mərasimində açıqlandı.

Ümumilikdə, ölkənin 17 təhsil ocağında təhsil alan 400-ə yaxın tələbənin müraciət etdiyi hakatonun final mərhələsində 30 komanda yarışmaq imkanı əldə etdi. Müsabiqə boyunca iştirakçıları “Azercell” və UFAZ-ın ekspertlərindən ibarət olan mentorlar qrupu müşayiət edib, öz peşəkar məsləhətlərini onlar ilə bölüşdülər. Komandalar 48 saat ərzində “korporativ bazar həlli”, “xərclərin idarə edilməsi həlli”, “oyun funksiyalı həll”, “rəqəmsal aktiv bazar həlli” və “ istedadların satışı həlli” mövzularını əhatə edən proqramlaşdırma tapşırıqları üzərində çalışdılar.
Münsiflər heyətinin qərarı ilə 1-ci yerə “3leet”, 2-ci yerə “Perihelion”, 3-cü yerə isə “Optimum” komandası layiq görüldü. Qeyd edək ki, komandalar təqdim etdiyi texniki və biznes təqdimatlara əsasən dəyərləndirildi. Qaliblər müvafiq olaraq 3 min, 2 min və 1000 AZN dəyərində pul mükafatları və “Azercell”in xüsusi hədiyyələri ilə təltif olundular.
Azərbaycanda yeni İKT mütəxəssisləri nəslinin inkişafına dəstək verməyi öz korporativ sosial məsuliyyət siyasətinin vacib istiqaməti hesab edən “Azercell” yarışmanın qaliblərini bir daha təbrik edir və gələcək fəaliyyətlərində uğurlar arzulayır!