Bakı, 9 mart, AZƏRTAC
Azərbaycanın hava məkanı qlobal aviasiya şəbəkəsində vacib rola malikdir.
AZAL-dan AZƏRTAC-a bildirilib ki, bu fikirləri Avropa Hava Naviqasiya Təhlükəsizliyi Təşkilatının (EUROCONTROL) baş direktoru Raul Medina və ICAO Şurasının prezidenti Salvatore Şakitano “Airspace World 2023” sərgisində AZAL-ın “Azəraeronaviqasiya” Hava Hərəkəti İdarəsi (AZANS) stendini ziyarət edərkən səsləndiriblər.
EUROCONTROL-un baş direktoru Raul Medina uçuşların səmərəliliyinin təmin edilməsi və ekoloji göstəricilərin yaxşılaşdırılması üçün bütün aviasiya sənayesi oyunçuları arasında əməkdaşlığın vacibliyini qeyd edib. O, həmçinin bildirib ki, bu məqsədlərə nail olmaq üçün qonşu dövlətlərlə sıx əlaqələrin qurulması xüsusi əhəmiyyət kəsb edir.
Bu xüsusda, Azərbaycanla qarşılıqlı faydalı əməkdaşlığa, hava məkanından istifadəyə və regionda dinamik axının idarə olunmasına görə minnətdarlıq ifadə olunub.