Bakı, 28 fevral, AZƏRTAC
Uşaqlar və yeniyetmələr arasında Braziliya Ciu-citsu döyüş sənətinin No-Gi versiyası üzrə turnir keçirilib.
AZƏRTAC xəbər verir ki, turnir Xocalı faciəsi qurbanlarının və Türkiyədə baş verən zəlzələdə həyatını itirənlərin xatirəsinə həsr olunub.
Yarışın əvvəlində Braziliya Ciu-Citsu idman növünün Azərbaycanda banisi, Braziliya Ciu-Citsu Klubu İctimai Birliyinin təsisçisi və idarə heyətinin sədri Taleh Həsənov çıxış edərək döyüşçülərə uğurlar arzulayıb.
Federasiyanın prezidenti Aqil Acalov, sədr müavinləri Anar Səfərov və Kamil Qocayev də çıxış edərək yarış haqqında məlumat verib, iştirakçılara uğurlar arzulayıblar. Daha sonra həm Xocalı faciəsi zamanı həyatını itirənlərin, həm də Türkiyədə zəlzələ nəticəsində həlak olanların xatirəsi bir dəqiqəlik sükutla yad edilib.
Yarışda respublikanın müxtəlif bölgələrindən yüzə yaxın idmançı iştirak edib. Sonda yarışın qaliblərinə medallar, diplomlar və kuboklar təqdim olunub.
Yarışda birinci yeri “Şikar Aslanov”, ikinci yeri “Hadiyev”, üçüncü yeri isə “Xəzər” komandaları tutublar.