Bakı, 27 fevral, AZƏRTAC

Estoniyanın paytaxtı Tallində keçirilən yeniyetmə və gənclər arasında qılıncoynatma üzrə Avropa çempionatında gənc sablyaçı oğlanların şəxsi yarışında qaliblər müəyyənləşib.
Azərbaycan Qılıncoynatma Federasiyasının mətbuat xidmətindən AZƏRTAC-a bildiriblər ki, Murad Əkbərov (4 qələbə), Maqsud Hüseynli (3 qələbə) və Saleh Məmmədov (3 qələbə) qrup mərhələsini uğurla adlayaraq pley-offa yüksəliblər. Qrup mərhələsində qələbələrin sayına görə birbaşa 32-liyə yüksələn M.Əkbərov bu mərhələdə polşalı Benedikt Denkieviçzə 15:13 hesabı ilə qalib gəlib. Təmsilçimiz növbəti mərhələdə ən güclü 8-liyə yüksəlmək uğrunda keçirilən görüşdə turnirin qalibi Marko Mastrulloya 12:15 hesabı ilə uduzub.
Maqsud Hüseynli pley-offda keçirdiyi ilk görüşdə ispan Xayme Florezə 15:13 hesabı ilə qalib gəlsə də, ən güclü 16-lığa yüksəlmək uğrunda keçirilən görüşdə rumıniyalı Radu Nituya 6:15 hesabı ilə məğlub olub.
Saleh Məmmədov bu mərhələdə ukraynalı Dmitrii Kolobaievə 4:15 hesabı ilə uduzub.
Ayxan Xasıyev isə pley-offa yüksələ bilməyib.