Quba, 24 fevral, Elxan Yusifli, AZƏRTAC

Bakı Beynəlxalq Multikulturalizm Mərkəzinin (BBMM) təşkilatçılığı ilə keçirilən “Mədəni müxtəliflikdə birlik: Azərbaycan nümunəsində” adlı XIII Beynəlxalq Multikulturalizm Qış Məktəbi işini Qubada davam etdirir.
Fevralın 24-də iştirakçılar daha iki mövzuda mühazirələr dinləyiblər.
AZƏRTAC-ın bölgə müxbiri xəbər verir ki, “Azərbaycan ədəbiyyatının tərcümələri mədəniyyətlər sərhədində ünsiyyət aktı kimi” mövzusunda mühazirəni professor Lyudmila Bejenaru (Rumıniya) təqdim edib.
Bildirilib ki, fərqli dillərdə danışan insanlarla ünsiyyət qurarkən, onların bir-birini başa düşməsinə kömək edəcək müəyyən ümumi dil lazımdır. Belə hallarda ünsiyyətin həyata keçirilməsinin mümkün yolu tərcümədir ki, bu da mədəniyyətlərarası ünsiyyətdə ən mühüm vasitədir.
Lyudmila Bejenaru qeyd edib ki, “Azərbaycan poeziyasının antologiyaları” (Moskva, “Bədii ədəbiyyat”, 1939) “Azərbaycan şairləri”, (1962-ci il Moskva), Alla Axundovanın tərcümə etdiyi “Bahar” toplusu Azərbaycanın böyük şairlərini bütün mədəniyyət aləminə tanıdılmasında mühüm rol oynayıb.
Tədqiqatçı mühazirəsində Prezident İlham Əliyevin Sərəncamı ilə yaradılmış Azərbaycan Dövlət Tərcümə Mərkəzinin rolunu xüsusi vurğulayıb. Bildirib ki, Mərkəz ölkədə tərcümə fəaliyyətini, Azərbaycan ədəbiyyatının beynəlxalq aləmdə və xarici ədəbiyyatın Azərbaycanda təbliğini təşviq edir.
Sonra Kristina Bossauer (Almaniya) iştirakçılara “Qurban Səidin “Əli və Nino” əsəri” mövzusunda mühazirə oxuyub. Qeyd edilib ki, "Əli və Nino" əsəri ilk dəfə 1937-ci ildə Vyanada alman dilində E.P.Tal Verlaq tərəfindən nəşr olunub. İndiyədək dünyanın 33 dilinə tərcümə edilib, 66 ölkədə çap olunub. Əsərin ilk nəşrində müəllif kimi Qurban Səid göstərilsə də, müəllifinin kimliyi ilə bağlı ötən dövrlər ərzində müxtəlif versiyalar irəli sürülüb. Amma kitabın dəyəri əsərdəki hadisələr, Rusiya inqilabı, müstəqil və demokratik Azərbaycanın qurulması və Qızıl Ordunun Bakını işğal etdiyi dövrləri əhatə etməsidir. Əsərdəki hadisələr əsasən real mənzərəni əks etdirir.
XIII Beynəlxalq Multikulturalizm Qış Məktəbinin iştirakçıları gün ərzində Qubada dağ yəhudilərinin kompakt şəkildə yaşadığı Qırmızı qəsəbə ilə yaxından tanış olacaq, sinaqoqları ziyarət edəcək, yəhudi icmasının üzvləri ilə görüşəcəklər. Qış məktəbinin iştirakçıları Quba Soyqırımı Memorial Kompleksini ziyarət zamanı ermənilərin törətdikləri soyqırımı haqqında ətraflı məlumatlandırılacaqlar.
Günün sonunda qış məktəbinin bağlanışına həsr edilən Qala gecəsi keçiriləcək.
Xatırladaq ki, “Heydər Əliyev İli”nə həsr olunan XIII Beynəlxalq Multikulturalizm Qış Məktəbi fevralın 26-dək davam edəcək.
XIII Beynəlxalq Multikulturalizm Qış Məktəbində Azərbaycan, Türkiyə, Braziliya, Rumıniya, Almaniya, Fələstin, Rusiya, ABŞ, Gürcüstan, Pakistan, İraq, Bolqarıstan, Mozambik, Mərkəzi Afrika Respublikası, Suriya, Şri-Lanka, Çin və Yaponiya kimi ölkələrin aparıcı universitetlərindən tələbələr iştirak edirlər.