ABŞ-ın Mayami-Deyd dairəsinin rəhbərliyi 26 fevral tarixini Xocalının Anım Günü elan edib
Bakı, 23 fevral, AZƏRTAC
ABŞ-ın Mayami-Deyd dairəsində 26 fevral 2023-cü il tarixi Xocalının Anım Günü kimi elan edilib.
Diasporla İş üzrə Dövlət Komitəsindən AZƏRTAC-a verilən xəbərə görə, bu barədə Mayami-Deyd dairəsinin meri Daniella Levin Kava və Mayami-Deyd dairəsinin Komissarları Şurasının sədri III Oliver G.Gilbert Bəyannamə imzalayıb.
ABŞ-ın keçmiş baş prokuroru Robert Frensis Kennedinin “Bəşəriyyətin tarixi saysız-hesabsız müxtəlif cəsarət və iman əməllərindən formalaşır. İnsan hər dəfə bir idealı müdafiə edəndə, başqalarının vəziyyətini yaxşılaşdırmaq üçün hərəkət edəndə və ya ədalətsizliyə qarşı mübarizə apardıqda, incə bir ümid dalğası göndərir” fikri ilə başlayan bəyannamədə bildirilib ki, 1992-ci il fevralın 25-dən 26-sına keçən gecə Azərbaycanın Xocalı şəhər əhalisinin qətliama məruz qalması nəticəsində aralarında çoxlu uşağın, qadının və ahılın olduğu 600-dən çox dinc və günahsız mülki şəxs qətlə yetirilib. Diqqətə çatdırılıb ki, insan haqları üzrə məşhur beynəlxalq təşkilatlar, o cümlədən “Human Rights Watch” bu faciəni bölgənin ən böyük qırğını adlandırıb.
Xocalı faciəsini “müharibə dövründə törədilən dəhşətli dağıntıların və bütün dünyada insanlar arasında daha çox anlaşma, ünsiyyət və tolerantlığa olan davamlı ehtiyacının ayıq bir xatırlatması” kimi səciyyələndirən bəyannamə müəllifləri Mayami-Deyd dairəsində, Florida ştatında və bütün dünyada yaşayan azərbaycanlıların hər il Xocalı qurbanlarının xatirəsini ehtiramla yad etdiklərini vurğulayıblar.
Bəyannamə müəllifləri Mayami-Deyd dairəsi adından fevralın 26-sını Xocalının Anım Günü elan ediblər və xeyirxah insanları Xocalı soyqırımının 31-ci ildönümünü yad etmək üçün yerli hakimiyyət nümayəndələrinə qoşulmağa çağırıblar.
Qeyd edək ki, Bəyannamə Florida ştatında fəaliyyət göstərən Azərbaycan-Amerika Gənclər Assosiasiyasının rəhbəri Nabat Eminovaya təqdim edilib.
Xocalı soyqırımı şahidinin xatirələri holland dilində dərc olunub
Xocalı soyqırımının 32-ci ildönümü ilə bağlı ümumukrayna onlayn konfransı keçirilib
Dmitri Savelyev: Xocalı hadisələrinə soyqırımından başqa ad vermək çətindir
Xocalı faciəsi ilə əlaqədar Sloveniyanın paytaxtında maarifləndirmə aksiyası keçirilib
Parisdə “İşgəncələr məbədi - Şuşa həbsxanası” sənədli filmi nümayiş olunub VİDEO