Bakı, 3 fevral, AZƏRTAC

“Azərişıq” ASC “ASAN xidmət”lə İş Departamenti tərəfindən 2022-ci il ərzində “ASAN xidmət”, “ASAN Kommunal” vasitəsilə və elektron qaydada 304 min 426 vətəndaşa xidmət göstərib.
AZƏRTAC xəbər verir ki, bunu “Azərişıq” ASC-nin “ASAN xidmət”lə İş Departamentinin direktor müavini İnam Yusifov qurumun 2022-ci ilin yekunlarına dair mətbuat konfransında deyib.
O bildirib ki, cari ildə “Azərişıq” ASC-yə “ASAN xidmət”, “ASAN Kommunal” vasitəsilə və elektron qaydada enerji təchizatı şəbəkəsinə qoşulması məqsədilə 53 minə yaxın müraciət daxil olub: “Bunlardan 45 min 544-ü əhali, 7039 qeyri-əhali müraciətidir. Elektron qaydada enerji təchizatı şəbəkəsinə qoşulmada 2021-ci illə müqayisədə 80 faiz artım qeydə alınıb”.
Qeyd edək ki, “ASAN xidmət” və “ASAN Kommunal” mərkəzlərində “Azərişıq” ASC 17 növ üzrə xidmət göstərir.