Bakı, 2 fevral, AZƏRTAC

Fevralın 1-də futbol üzrə İspaniya çempionatının 19-cu turunun bir oyunu keçirilib.
AZƏRTAC xəbər verir ki, turnir cədvəlinin lideri “Barselona” səfərdə “Betis”lə qarşılaşıb.
Görüş qonaqların 2:1 hesablı qələbəsi ilə başa çatıb. Oyunda bütün qolları kataloniyalılar vurublar. Matçın 65-ci dəqiqəsində Rafinya hesabı açıb. 80-ci dəqiqədə Levandovski fərqi iki topa çatdırıb – 0:2. Sona beş dəqiqə qalmış isə “Barselona”nın müdafiəçisi Jül Kunde avtoqola imza atıb – 1:2.
Beləliklə, çempionatda növbəti qələbəsini qazanan Xavinin yetirmələri bir oyun çox keçirməklə “Real Madrid”lə xal fərqini 8-ə yüksəldiblər.
Qeyd edək ki, “Real Madrid” növbəti tur öz meydanında “Valensiya” ilə qarşılaşacaq.