×
A
A
A
Sazlamalar

Quranın yandırılması beynəlxalq müstəvidə kəskin pislənildi

Bakı, 26 yanvar, AZƏRTAC

Türkiyə Diyanət İşləri Başkanlığının təşkilatçılığı ilə Dünya Müsəlmanları Dini Liderlərinin konfransı keçirilib.
Qafqaz Müsəlmanları İdarəsindən (QMİ) AZƏRTAC-a bildirilib ki, onlayn formatda təşkil olunan tədbirdə 69 ölkədən 130 iştirakçı İsveçdə və Niderlandda Quranın yandırılmasına etirazını bildirib.
QMİ sədrinin birinci müavini Müfti Salman Musayev QMİ sədri şeyxülislam Allahşükür Paşazadənin salam-dualarını tədbir iştirakçılarına yetirib. Müfti Azərbaycan dindarlarının münasibətini konfrans iştirakçılarının diqqətinə çatdıraraq bildirib ki, QMİ bu vandalizm aktını qətiyyətlə pisləyən bəyanatla çıxış edib. Sənəddə müqəddəs kitabımızın yandırılması iki milyarda yaxın ardıcılı olan İslam dinini hədəf alan təhqir aktı kimi dəyərləndirilib. Dini mərkəz olaraq QMİ bu hadisəni qətiyyətlə pisləyib. Bəyanatda qeyd edilib ki, dəfələrlə törədilən və bu gün də törədilməkdə olan belə vandalizm əməllərinin məqsədi beynəlxalq miqyasda ekstremizmə təkan vermək, terroru təşviq etməkdır. Dini zəmində qarşıdurmaya təşviq edən nifrətə çağırış, təcavüz və zorakılığa təhrik edən belə əməllər bəşəri təhlükəyə çevrilməkdədir. Dindən siyasi məqsədlər üçün sui-istifadə halları, ksenofobiya təzahürləri cəmiyyətlərin və dövlətlərin daxili sabitliyini pozmağa, qarşıdurma və nifaq yaratmağa xidmət edir.
Müfti çıxışında bildirib ki, Qafqaz Müsəlmanları İdarəsi bütün dünya ölkələrini, beynəlxalq təşkilatları və dini qurumları törədilən əməli qətiyyətlə qınamağa və din pərdəsi altında hər hansı radikalizm təzahürlərini, dindən sui-istifadə edən ekstremizm, ksenofobiya hallarını, inancından, əqidəsindən asılı olmayaraq insanların mənəvi dəyərlərinə, dini rəmzlərinə və şəxsiyyətlərə, dinlərin müqəddəs məkanları və atributlarına qarşı nifrət çağırış və təhqir hallarının baş verməməsi üçün səy göstərməyə çağırıb. Sənəddə qeyd olunduğu kimi, söz azadlığı heç də mənəvi hisslərə toxunmaq, nifrətə çağırışlara təhrik etmək deyil, əksinə, insanları mənəviyyata dəvət etmək olmalıdır.
Onlayn konfransda çıxış edən dünyanın tanınmış müsəlman din xadimləri İsveçdə və Niderlandda Qurana qarşı törədilən çirkin davranışı inanca, hüquqa və bəşəri dəyərlərə qəsd kimi dəyərləndiriblər. Tədbir iştirakçıları bildiriblər ki, İslam dininə, müqəddəs dəyərlərimizə hücumlara qarşı bütün dünya müsəlmanları birlikdə hərəkət edəcək, belə çirkin əməlli törədənlərə layiqli şəkildə cavab verəcəklər.

Din 2023-01-26 14:56:00