Bakı, 10 yanvar, AZƏRTAC

Çin Xalq Respublikasının Meteorologiya İdarəsinin məlumatına görə, bu idarənin mütəxəssisləri 2023-cü ildə əsas diqqəti hava proqnozlarının dəqiqliyinin artırılmasına yönəldəcəklər.
AZƏRTAC Sinxua agentliyinə istinadla xəbər verir ki, idarə öz proqnozlarında anomal meteoroloji hadisələrin bütün tiplərini tam əhatə etməklə süni intellekt və bir neçə mənbədən alınan informasiyanın birləşdirilməsi yolu ilə iqlim hadisələrinin proqnozlaşdırılmasını təkmilləşdirəcək, müvafiq xəbərdarlıq prosedurlarını yaxşılaşdıracaq.
İdarədən verilən məlumata görə, unikal iqlim şəraiti ilə fərqlənən əsas rayonlarda hava proqnozlarının təkmilləşdirilməsi və qlobal iqlim anomaliyalarının proqnozlaşdırılması diqqət mərkəzində olacaq.
İdarə bildirir ki, çinli mütəxəssislər əlverişsiz hava hadisələrindən 42 dəqiqə əvvəl bu barədə əhaliyə xəbərdarlıq etməyə, habelə leysan yağışlarının proqnozlaşdırılması dəqiqliyini 91 faizə çatdırmağa hazırdırlar.