Bakı, 8 yanvar, AZƏRTAC

“Sədərək” ticarət mərkəzində baş verən yanğın zamanı təhlükəsizlik tədbirlərinə cəlb olunan bir polis əməkdaşı tüstüdən zəhərlənib.
AZƏRTAC Daxili İşlər Nazirliyinin mətbuat xidmətinə istinadla xəbər verir ki, polis əməkdaşı zəhərlənmə diaqnozu ilə xəstəxanaya yerləşdirilib.
Onun müalicəsi davam etdirilir.
Sədərək ticarət mərkəzində baş verən yanğın zamanı ilk dəqiqələrdən polis əməkdaşları hadisə yerinə cəlb edilmiş, təhlükəsizliyi təmin etmiş, köməyə ehtiyacı olanlara köməklik göstərmişlər. Baş Dövlət Yol Polisi İdarəsinin əməkdaşları da həmin əraziyə yanğınsöndürən maşınların və təcili tibbi yardım avtomobillərinin maneəsiz hərəkətini, eyni zamanda yolda təhlükəsiz qaydada hərəkətin bərpasını təmin etmişlər.