İmişli, 6 yanvar, Aydın Yavərzadə, AZƏRTAC

İmişlidə yol nəqliyyat hadisəsi baş verib. Qəza zamanı altı nəfər müxtəlif dərəcəli bədən xəsarətləri alıb.
AZƏRTAC-ın bölgə müxbiri xəbər verir ki, hadisə saat 16 radələrində İmişliyə giriş yolunun Soltanmuradlı kəndindən keçən hissəsində qeydə alınıb.
Hadisə zamanı Camalov Nazim Sadıq oğlunun idarə etdiyi “Qaz-3110” və Məmmədov Xəyal Xeyrulla oğlunun idarə etdiyi “Mercedes 190” markalı avtomobillər toqquşub. Qəza nəticəsində “Mercedes”in sürücüsü və sərnişinlər, Rəhimov Fəxrəddin Şafa oğlu, Camalova Alamara Sadiq qızı, Camalova Turfan Mahmud qızı, Dədəliyeva Səbinə Aydın qızı, Cavadov Sadiq Musa oğlu müxtəlif dərəcəli bədən xəsarətləri alıblar.
Yaralılar İmişli rayon Mərkəzi xəstəxanasına yerləşdirilib, ilkin tibbi yardım göstərilib.
Faktla bağlı araşdırma aparılır.