On bir ayda ölkədə elektrik enerjisi istehsalı artıb
Bakı, 16 dekabr, AZƏRTAC
Elektrik enerjisinə dair operativ məlumatlara əsasən, 2022-ci ilin noyabr ayında Azərbaycanda elektrik enerjisinin istehsalı 2 milyard 506 milyon kilovat-saat təşkil edib ki, bu da ötən ilin eyni dövrü ilə müqayisədə istehsalın 96 milyon kilovat-saat, yaxud 4 faiz artması deməkdir.
Energetika Nazirliyindən AZƏRTAC-a bildirilib ki, ötən ay ərzində elektrik enerjisinin idxalı 10,5 milyon kilovat-saat olmaqla 2021-ci ilin müvafiq dövrü ilə müqayisədə 0,1 milyon kilovat-saat, ixrac isə 448,9 milyon kilovat-saat olmaqla ötən ilin müvafiq dövrünə nisbətən 216,9 milyon kilovat-saat artıb.
Ümumilikdə cari ilin yanvar-noyabr aylarında respublika üzrə elektrik enerjisinin istehsalı ötən ilin eyni dövrü ilə müqayisədə 978,2 milyon kilovat-saat, yəni 3,9 faiz artaraq 26 milyard 260,3 milyon kilovat-saat təşkil edib.
Hesabat dövründə ötən ilin 11 ayına nisbətən elektrik enerjisinin istehsalı istilik elektrik stansiyalarında (İES) 623,3 milyon kilovat-saat artaraq 24 milyard 404,9 milyon kilovat-saat, su elektrik stansiyalarında (SES) 339,4 milyon kilovat-saat artaraq 1 milyard 532,8 milyon kilovat-saat, digər mənbələr (külək elektrik stansiyaları (KES), günəş elektrik stansiyaları (GES) və bərk məişət tullantılarının yandırılması zavodu (BMTYZ)) üzrə isə 15,5 milyon kilovat-saat artaraq 322,6 milyon kilovat-saat olub.
On bir ayda KES-də 79,1 milyon kilovat-saat, GES-də 59 milyon kilovat-saat, BMTYZ-də isə 184,5 milyon kilovat-saat elektrik enerjisi istehsal edilib.
Cari ilin yanvar-noyabr ayları üzrə elektrik enerjisinin istehsalı “Azərenerji” ASC üzrə 23 milyard 696,7 milyon kilovat-saat (İES-lərdə 22 milyard 277,2 milyon kilovat-saat, SES-lərdə 1 milyard 419,5 milyon kilovat-saat), Naxçıvan MR Dövlət Energetika Xidməti üzrə 439,8 milyon kilovat-saat (İES-lərdə 285,8 milyon kilovat-saat, SES-lərdə 99,4 milyon kilovat-saat, GES-də 54,6 milyon kilovat-saat), “Azərişıq” ASC üzrə külək elektrik stansiyalarında 59,3 milyon kilovat-saat, müstəqil elektrik stansiyaları üzrə isə 2 milyard 64,5 milyon kilovat-saat olub.
Hesabat dövründə elektrik enerjisinin idxalı 126,3 milyon kilovat-saat, ixracı isə 2 milyard 546,8 milyon kilovat-saat təşkil edib.
“Azərişıq”: Kəlbəcər Rəqəmsal İdarəetmə Mərkəzinin tikintisi davam edir
Macarıstan gələn il Türkiyədən qaz tədarükünə başlayacaq
Azərbaycanda elektrik enerjisi istehsalı artıb
Mingəçevirdə müstəqillik dövrünün ən böyük elektrik stansiyası tikilir
“Azərişıq” ASC Hacıqabulda yenidənqurma işlərini davam etdirir