Bakı, 12 dekabr, AZƏRTAC
Bakı Dizayn Akademiyası və İnnovasiya və Rəqəmsal İnkişaf Agentliyinin əməkdaşlığı çərçivəsində “Technest” təqaüdçüləri üçün master-klas keçirilib.
AZƏRTAC xəbər verir ki, tədbirdə Bakı Dizayn Akademiyasında Peşəkar UX&UI proqramında pedaqoq kimi fəaliyyət göstərən mütəxəssis Aqşin Rəcəbov və Akademiyanın müəllimi olan Peşəkar UX&UI-i üzrə türkiyəli mütəxəssis Nilay Ocak təcrübələrini iştirakçılarla bölüşüb.
Aqşin Rəcəbov “İnsanların davranış və vərdişlərinin dizaynı”, Nilay Ocak isə “Design Thinking” mövzularında tədbir iştirakçılarına master-klas keçiblər. Nilay Ocak çıxışdan sonra iştirakçıları komandalara bölərək master-klas ərzində öyrənilənləri yarışma üsulu ilə praktikaya çevirib.
Qeyd edək ki, 2018-ci ildən fəaliyyət göstərən Bakı Dizayn Akademiyası dizayn sahəsinin müxtəlif istiqamətləri üzrə beynəlxalq səviyyəli mütəxəssislər yetişdirən təhsil müəssisəsidir. Akademiyada dizayn sahəsinin UX&UI, Qrafik dizayn, İnteryer Dizayn, Animasiya Dizaynı, 3D dizayn və “Graphic Art Direction” ixtisasları tədris olunur. Eyni zamanda, Akademiya 2021-ci ildən etibarən ABŞ-ın “Adobe” və “Autodesk” şirkətlərinin Azərbaycanda yeganə rəsmi təmsilçisidir. “Adobe” və “Autodesk” şirkətlərinin beynəlxalq səviyyədə tanınan sertifikatlarını əldə etmək istəyənlər Bakı Dizayn Akademiyasının nəzdində yerləşən Beynəlxalq İmtahan Mərkəzində imtahan verirlər.