Şirvan, 9 dekabr, Aydın Yavərzadə, AZƏRTAC

Nəqliyyatda Baş Polis İdarəsinin Dəmir yolu Nəqliyyatında Polis İdarəsinin İmişli stansiya Xətt Polis Şöbəsinin Şirvan stansiya Xətt Polis bölməsinin əməkdaşlarının keçirdiyi tədbirlər nəticəsində axşam saatlarında dəmir yolu relslərini kəsərək aparmaq istəyən şəxslər saxlanılıblar.
Daxili İşlər Nazirliyinin mətbuat xidmətinin Şirvan regional qrupundan AZƏRTAC-ın bölgə müxbirinə verilən məlumata görə, keçirilən tədbirlərlə Şirvan çeşidləmə mənzilinin 48-ci kilometrliyində, dəmir yolunun yaxınlığında 3 ədəd dəmir yolu relsini kəsərək avtomobilə yükləyən zaman üç nəfər saxlanılıb. Araşdırmalarla onların Şirvan şəhər sakinləri A.Hüseynov, C.Səlimov və E.Səlimov olduqları müəyyən edilib.
Həmin şəxslər maddi sübutla birlikdə Şirvan stansiya Xətt Polis bölməsinə gətiriliblər.
Faktla bağlı araşdırmalar davam etdirilir.