Bakı, 8 dekabr, AZƏRTAC

Paytaxtda polis əməkdaşları daxil olmuş məlumatlar əsasında keçirdikləri əməliyyat tədbirləri ilə Səbail və Nərimanov rayonları ərazilərində evlərin qarşısından ayrı-ayrı vətəndaşlara məxsus velosipedləri oğurlamaqda şübhəli bilinən şəxsləri müəyyənləşdiriblər.
Daxili İşlər Nazirliyinin mətbuat xidmətindən AZƏRTAC-a bildiriblər ki, görülmüş tədbirlər nəticəsində Göygöl rayon sakini Natiq İsmayılov və Qubadlı rayon sakini, əvvəllər məhkum olunmuş İslam Məmmədov saxlanılıblar.
Gəncə Şəhər Baş Polis İdarəsinin 1-ci polis şöbəsi əməkdaşlarının keçirdikləri əməliyyat tədbiri nəticəsində isə şəhər ərazisindəki evlərin birinin qarşısından velosiped oğurlamaqda şübhəli bilinən Göygöl rayon sakini, əvvəllər məhkum olunmuş Elnur İsmayılov yaxalanıb.
Faktlarla bağlı araşdırmalar aparılır.