Bakı, 8 dekabr, AZƏRTAC
Dekabrın 8-də saat 3 radələrində Biləsuvar rayonu, Xırmandalı kəndində kənd sakini 1982-ci il təvəllüdlü Mehtun Qarayevin üzərində qırma xəsarətləri olan meyiti aşkarlanıb.
Daxili İşlər Nazirliyinin mətbuat xidmətindən AZƏRTAC-a bildirilib ki, polis əməkdaşları tərəfindən cinayəti törətməkdə şübhəli bilinən şəxsin, yaxud şəxslərin müəyyən olunub saxlanılması istiqamətində “isti izlərlə” əməliyyat-axtarış tədbirləri görülüb.
Şəxsi münasibətlər zəminində əməli törətməkdə şübhəli bilinən həmin kənd sakini 1985-ci il təvəllüdlü Cavad Kərimov saxlanılıb. Ondan cinayət aləti olan ov silahı aşkar olunaraq götürülüb.