×
A
A
A
Sazlamalar

“Gənclər arasında erkən nikahlar və onun mənfi tərəfləri” mövzusunda seminar təşkil olunub

Bakı, 23 noyabr, AZƏRTAC

Mingəçevir Dövlət Universitetinin (MDU) Təhsil fakültəsinin Humanitar fənlər kafedrasının təşkilatçılığı ilə “Gənclər arasında erkən nikahlar və onun mənfi tərəfləri” mövzusunda seminar keçirilib.
MDU-dan AZƏRTAC-a bildiriblər ki, fakültənin əməkdaşları, tələbə və magistrantların iştirak etdiyi seminarda kafedra müdiri Esmira Cəfərova giriş sözü ilə çıxış edib. Erkən nikahın dövrümüzün aktual problemlərindən biri olduğunu qeyd edən E.Cəfərova cəmiyyətin inkişafına mənfi təsir göstərən bu halların qarşısının alınması üçün əhali arasında maarifləndirmə işlərinin gücləndirilməsinin önəmini vurğulayıb və seminarın əhəmiyyətini diqqətə çatdırıb.
Sonra fakültənin akademik heyət üzvlərindən Hüseyn Əsgərov “Erkən nikahlar: hüquqi aspektlər və problemlər”, Nərgiz Niftəliyeva “Erkən nikahın yol açdığı psixoloji fəsadlar” və Vüsalə Mustafayeva “Erkən nikahlar nəticəsində yaranan fəsadların bioloji təhlili” mövzusunda məruzələrlə çıxış ediblər.
Məruzələrdə erkən nikahın fərdi inkişafa, sağlamlığa və psixologiyaya mənfi təsirləri, problemin qarşısının alınması məqsədilə mümkün qabaqlayıcı və profilaktiki işlər barədə danışılıb, problemin hüquqi həlli və uşaq hüquqlarının pozulmasına qarşı mübarizə tədbirləri ilə bağlı ətraflı məlumatlar verilib.
Daha sonra mövzu ətrafında müzakirələr aparılıb və iştirakçıların sualları cavablandırılıb.

Regionlar 2022-11-23 00:38:00