Biləsuvar, 21 noyabr, İsmayıl Cəfərli, AZƏRTAC

Vətəni Ərəbistan yarımadası olan Mədinə xurması düz 27 ildən sonra ölkəmizin Aran rayonlarından birində - Biləsuvarda bar gətirib. Maraqlısı isə xurmanın qış fəslinə yaxın öz rəngi və dadı ilə yetişməsidir.
AZƏRTAC xəbər verir ki, ara-sıra respublikamızın ayrı-ayrı bölgələrində təsadüf edilən bu cür qeyri-adi təbiət hadisəsinə bu dəfə Biləsuvarın Bəydili kəndində rast gəlinib. Təxminən 7 metrdən çox hündürlüyü olan Mədinə xurması əkildikdən 27 il sonra bar verib. Ev sahibi Telman Əliyev deyir ki, bu ağac həyətə atılan meyvənin çəyirdəyindən yetişib: “Bunun həqiqətən də maraqlı tarixçəsi var. 1995-ci ildə kəndimizdə seyid MirTaha ağa rəhmətə getmişdi. Həcc ziyarətindən qayıtmışdı, mən onu ziyarət etməyə getdim, görüşdüm. Mənə balaca qutuda Mədinə xurması verdi. Biz də onu istifadə edəndən sonra çəyirdəyini həyətdə, pencərənin qarşısındakı qumluq olan yerə atdıq. Növbəti il gördüm ki, həmin çəyirdək göyərib və yetişir”.
Bundan sonra ev sahibləri ağaca sevə-sevə qulluq göstəriblər. Telman kişi bildirib ki, qış fəslində ağacı şaxtadan qorumaq üçün təxminən 10 il onun üzərinə polietilen örtük çəkib: “Ağac sağlam inkişaf etdiyi üçün sonradan buna ehtiyac olmadı. Nəhayət 27 ildən sonra - bu ilin yayında üstündə çoxlu tumurcuqları görəndə bildim ki, ağac meyvə gətirəcək. Maraqlısı isə odur ki, soyuq aylar olmasına baxmayaraq, meyvə öz rəngi və dadı ilə yetişir. Deyərdim ki, bazardan aldığımızdan da dadlıdır”.
Ailə üçün də maraqlı olan bu xurma salxımlarının hər birinin çəkisi 5-8 kiloqramdır. Mütəxəssislər ekvatorial ərazilərdə səhra iqlim şəraitində inkişaf edən Mədinə xurmasının Biləsuvarda yetişməsini nadir təbiət hadisəsi sayırlar.
Kənd təsərrüfatı mütəxəssisi Mirsahib Zəkiyevin sözlərinə görə, İranda yetişən xurma sortlarının burada yetişib məhsul verməsi mümkündür: “Ancaq Ərəbistanın iqlim-torpaq şəraiti tam fərqlidir. Ora səhra iqlimidir, torpaqların münbitliyi zəifdir, həm də yüksək temperatur olur, yay aylarında 50 dərəcədən yüksək. Bizim Muğan zonasında isə elə temperatur qeydə alınmır. Ona görə də Mədinə xurmasının Biləsuvarda məhsul verməsi nadir hadisə sayılır”.