Bakı, 16 noyabr, AZƏRTAC

Avropada Təhlükəsizlik və Əməkdaşlıq Təşkilatının (ATƏT) Vyanada 2022-ci ilin İqtisadi və Ətraf Mühit ölçüsü üzrə təşkil etdiyi implementasiya iclası çərçivəsində “Qadınların iqtisadi sahədə iştirakı ilə bağlı ATƏT öhdəliklərinin icrası üzrə nəticələrin müzakirəsi” sessiyası keçirilib.
57 üzv ölkənin təmsil olunduğu sessiyada iştirak edən Əmək və Əhalinin Sosial Müdafiəsi Nazirliyinin Beynəlxalq əlaqələr şöbəsinin müdir müavini Svetlana Popova tədbirdə Azərbaycanda aparılan sosial islahatlar barədə məlumat verib.
Nazirliyin İctimaiyyətlə əlaqələr şöbəsindən AZƏRTAC-a verilən məlumata görə, əmək, məşğulluq, sosial təminat sahələrində innovativ həllərin geniş tətbiqi sahəsində əldə olunan uğurlar, DOST konsepsiyası, qadınların aktiv məşğulluq proqramları ilə əhatə olunması sahəsində ölkəmizdə görülən işlər diqqətə çatdırılıb.
Azərbaycanda son illərin sosial islahatlar təcrübəsi, həmçinin əmək bazarında gender bərabərliyinə nail olunması sahəsində aparılan işlərə dair məlumatlar sessiya iştirakçıları tərəfindən maraqla qarşılanıb.