Bakı, 10 noyabr, AZƏRTAC

Bu gün futzal üzrə Yüksək Liqada altıncı tura start verilib. Bununla da liqada ikinci dövrə başlayıb.
AZƏRTAC xəbər verir ki, günün ilk oyununda “Neftçi” və “Baku Fire” komandaları üz-üzə gəliblər. Qarşılıqlı hücumlar şəraitində keçən oyunda “Baku Fire” komandası 2:1 hesablı qələbə qazanıb. Komandalar arasında baş tutmuş mövsümün açılış matçı qolsuz heç-heçə ilə başa çatmışdı.
Sonra parket üzərinə “Araz-Naxçıvan” və “Alyans” komandaları çıxıblar. Görüş Azərbaycan çempionu – “Araz-Naxçıvan”ın böyük hesablı qələbəsi ilə yekunlaşıb – 11:1.
Turun sonuncu oyununda “Record” yeni formalaşan və Avropa çempionatında ölkəmizi təmsil edəcək U-19-la üz-üzə gəlib. Matçda “Record” rəqibini 9:1 hesabı ilə məğlub edib.
Turnir cədvəlinə 15 xalla “Araz-Naxçıvan” klubu liderlik edir. “Baku Fire” 13 xalla ikinci, “Neftçi” 10 xalla üçüncüdür. “Record” (9 xal) dördüncü, “Alyans” (3) beşinci, hesabında xal olmayan U-19 isə sonuncu – altıncı pillədə qərarlaşıblar.