Bakı, 28 sentyabr, AZƏRTAC

Üzeyir Hacıbəyli adına Bakı Musiqi Akademiyasında "Şəhidlərin xatirəsinə..." adlı Anım Gününə həsr olunmuş konsert təqdim olunub.
Akademiyadan AZƏRTAC-a bildirilib ki, tədbirdə əvvəlcə Azərbaycanın ərazi bütövlüyü uğrunda canlarını qurban vermiş Vətən müharibəsi şəhidlərinin əziz xatirəsi bir dəqiqəlik sükutla yad edilib.
Xalqımızın qəhrəman oğullarının xatirəsinə həsr olunmuş tədbirdə Bakı Musiqi Akademiyasının "İxtisas fortepiano" kafedrasının müəllimləri-professorlar, Xalq artistləri Yeganə Axundova, Ülviyyə Hacıbəyova, Gülnaz İsmayılova, dosentlər Züleyxa Abdulla, Nərgiz Salmanlı, Aynur Xəlilova, baş müəllim Sevda Məmmədli, beynəlxalq müsabiqələr laureatı Səbinə Qasımova zəngin ifalarla çıxış ediblər.
Konsertdə Azərbaycan və xarici ölkə bəstəkarlarının əsərləri səsləndirilib.