Bakı, 26 sentyabr, AZƏRTAC

Təhsil İnstitutunun Metodik Dəstək və Peşəkar İnkişaf Mərkəzi tərəfindən internat məktəblərində işləyən psixoloqlar üçün keçirilən ixtisasartırma təlimləri davam edir.
İnstitutdan AZƏRTAC-a bildirilib ki, “İnternat məktəblərinin psixoloqları üçün psixoloji işin təşkili” adlı təlim proqramı 36 akademik saatdan ibarətdir və onlayn formatda həyata keçirilir. Təlimlərin keçirilməsində məqsəd internat məktəblərində işləyən psixoloqların nəzəri bilik və praktik səriştələrinin artırılmasıdır. Təlimlərdə iştirak edən müdavimlər şəxsiyyət haqqında nəzəriyyələr, məktəblərdə psixoloji xidmətin təşkili, psixodiaqnostika və psixokorreksiyanın həyata keçirilməsi, xüsusi təlimə ehtiyacı olan uşaqlarla işin təşkili və s. mövzular üzrə bilik və bacarıqlarını təkmilləşdirəcəklər.
İnternat məktəblərində işləyən psixoloqların yeni qrupları üçün növbəti həftələrdə də təlimlərin təşkili planlaşdırılır.