Roma, 23 sentyabr, AZƏRTAC

Qarşıdakı 50 ildə İtaliya əhalisinin sayının 11,5 milyon nəfər azalacağı proqnozlaşdırılır.
AZƏRTAC xəbər verir ki, bu barədə İtaliya Milli Statistika İnstitutu (ISTAT) məlumat yayıb. Bildirilib ki, 2021-ci il yanvarın 1-nə ölkə əhalisinin sayı 59,2 milyon nəfər olub. 2030-cu ildə əhalinin sayının 57,9 milyon, 2050-ci ildə 54,2 milyon və 2070-ci ildə 47,7 milyon nəfərədək azalacağı gözlənilir. Ailələrin sayının artacağı, lakin uşaqlı ailələrin sayının daha az olacağı proqnozlaşdırılır. Belə ki, 2041-ci ilədək hər 4 ailədən yalnız birinin uşaqlı ailələrdən ibarət olacağı gözlənilir.
ISTAT-a görə, İtaliyanın 5 şəhərindən dördündə və 10 kənd bələdiyyəsindən doqquzunda əhalinin sayı azalacaq.
Nihad Budaqov
AZƏRTAC-ın xüsusi müxbiri
Roma