Sarayevo, 21 sentyabr, AZƏRTAC

Rusiya Avropa İttifaqının (Aİ) Bosniya və Herseqovinadakı sülhməramlı missiyasının (EUFOR “Althea”) səlahiyyət müddətinin uzadılmasını dəstəkləyəcək.
AZƏRTAC xəbər verir ki, bu sözləri Bosniya və Herseqovinanın Rəyasət Heyətinin serb əsilli sədri Milorad Dodik deyib.
“Prezident Vladimir Putindən Rusiyanın sülhməramlı missiyasının səlahiyyət müddətinin uzadılmasına dəstək verməsini xahiş etdim və o, bununla razılaşdı. Vladimir Putin bildirdi ki, əgər sülhməramlı missiyanın səlahiyyət müddətinin uzadılmasında hər hansı gizli məqsəd yoxdursa, bu, Rusiya üçün heç bir problem yaratmayacaq”, - deyə M.Dodik vurğulayıb.
Qeyd edək ki, Bosniya və Herseqovinada yaşanan siyasi gərginliyə görə kontingent sayı xeyli artırılan EUFOR-un səlahiyyət müddəti Rusiyanın daimi üzvü olduğu BMT Təhlükəsizlik Şurasının qərarı ilə hər il uzadılır.