Bakı, 19 sentyabr, AZƏRTAC

Energetika naziri Pərviz Şahbazov ilə Belçika Krallığının energetika naziri Tinne Van der Straeten arasında onlayn formatda görüş olub.
Energetika Nazirliyindən AZƏRTAC-a bildirilib ki, görüşdə qlobal enerji gündəliyində olan məsələlər və Azərbaycanın enerji istehsalı və ixracı istiqamətində həyata keçirdiyi tədbirlər nəzərdən keçirilib. İki ildən az bir vaxtda Cənub Qaz Dəhlizi ilə Avropa ölkələrinə artan dinamika üzrə təbii qaz tədarük edildiyi, enerji sahəsində Avropa İttifaqı ilə yenilənmiş Strateji Tərəfdaşlıq Sənədinə uyğun olaraq hazırda layihənin ötürücülük gücünün artırılmasının prioritet olduğu qeyd olunub.
Eyni zamanda, Azərbaycanın enerji təhlükəsizliyinin təminatına növbəti perspektiv töhfəsi kimi Xəzər dənizinin külək enerjisi potensialının Şərqi Avropaya ixracı ilə bağlı planları diqqətə çatdırılıb. Həm təbii qaz tədarükünün artırılması, həm də külək enerjisinin ixracı üçün infrastruktura investisiyaların yatırılmasının və əməkdaşlığın vacibliyi vurğulanıb. Bu istiqamətdə Avropa İttifaqı ilə Azərbaycan arasında enerji dialoqunun əhəmiyyətindən bəhs edilib.
Görüşdə, həmçinin Belçika Krallığı ilə ikitərəfli enerji əməkdaşlığının imkanlarına dair fikir mübadiləsi aparılıb.