Sumqayıt, 4 iyul, Ətrabə Rzayeva, AZƏRTAC

2022/2023 mövsümü üçün transfer çalışmalarını davam etdirən “Sumqayıt” futbol klubu növbəti oyunçunu heyətinə cəlb edib.
AZƏRTAC klubun mətbuat xidmətinə istinadla xəbər verir ki, Cənubi Afrika Respublikasının “Maritzburq Yunayted” klubunda çıxış etmiş Steven Pereira ilə 2+1 illik müqavilə imzalanıb. 28 yaşlı müdafiəçi komandada “5” nömrəli formada çıxış edəcək.
Hollandiya futbolunun yetirməsi olan Steven Pereira adıçəkilən ölkədə “Zvolle”, “Maastrixt” kimi klublarda çıxış edib. Pereira karyerası boyunca bu klublarla yanaşı, Bolqarıstanın “ÇSKA” (Sofiya), Portuqaliyanın “Santa Klara”, “Akademiko Viseu” və “Oliveyrense” klublarının da uğurları üçün çalışıb.