Sumqayıt, 30 iyun, Ətrabə Rzayeva, AZƏRTAC

Sumqayıt Regional Mədəniyyət İdarəsinin Xızı rayon nümayəndəliyinin əməkdaşları Sitalçay kəndindən olan şəhid Elnur Fəxrəddin oğlu Ağaəhmədovun ailəsini ziyarət ediblər.
İdarədən AZƏRTAC-a bildirilib ki, görüş zamanı Elnurun döyüş yolundan söhbət açılıb, onun qəhrəmanlıqlarından bəhs edilib, ailənin problemləri dinlənilib. Sonra mədəniyyət işçiləri şəhidin məzarını ziyarət ediblər.
Azərbaycan Ordusunun kiçik giziri Elnur Ağaəhmədov 2020-ci il sentyabrın 27-də başlanan 44 günlük Vətən müharibəsində iştirak edib, oktyabrın 26-da Xocavənd döyüşləri zamanı Qırmızı bazar istiqamətində qəhrəmancasına şəhid olub.
"Vətən uğrunda", "İgidliyə görə", "Kəlbəcərin azad olunmasına görə", "Cəbrayılın azad olunmasına görə", "Xocavəndin azad olunmasına görə" medalları ilə təltif edilib.