×
A
A
A
Sazlamalar

Zaqatalada narkotik tərkibli bitkilər yetişdirən şəxs saxlanılıb

Bakı, 27 iyun, AZƏRTAC
Zaqatalada icarəyə götürdüyü torpaq sahəsində narkotik tərkibli bitkilər yetişdirən şəxs saxlanılıb.
Zaqatala Rayon Polis Şöbəsinin əməkdaşları tərəfindən keçirilən əməliyyat zamanı narkotik tərkibli bitkilərin kultivasiyası ilə məşğul olan rayon sakini saxlanılıb.
DİN-in Mətbuat Xidmətinin Şəki regional qrupundan AZƏRTAC-a bildiriblər ki, Paşan kəndi ərazisindəki qarğıdalı sahəsində çətənə kollarının becərilməsi barədə polis şöbəsinə məlumat daxil olub. Ərazi dərhal nəzarətə götürülüb və keçirilən əməliyyat tədbiri nəticəsində həmin kənd sakini Məmməd İsayev narkotik tərkibli bitkilərə qulluq edərkən yaxalanıb. Əraziyə baxış zamanı oradan kultivasiya edilən 25 ədəd çətənə kolu aşkarlanıb. M.İsayev ifadəsində narkotik tərkibli bitkiləri bir müddət əvvəl icarəyə götürdüyü torpaq sahəsində becərdiyini və xüsusi qulluq göstərdiyini etiraf edib.
Faktla bağlı cinayət işi başlanılıb, saxlanılan şəxsin ətrafında əməliyyat-istintaq tədbirləri davam etdirilir.

Cəmiyyət 2022-06-27 16:48:00