×
A
A
A
Sazlamalar

İyulda “Buta Airways” Ufa şəhərinə uçuşlara başlayacaq

Bakı, 14 iyun, AZƏRTAC

“Buta Airways” aşağıbüdcəli aviaşirkəti iyul ayında Bakıdan Ufa şəhərinə və geriyə uçuşları bərpa edir.
“Buta Airways” aviaşirkətinin mətbuat xidmətindən AZƏRTAC-a bildirilib ki, aviaşirkət iyulun 3-dən etibarən Heydər Əliyev Beynəlxalq Aeroportundan Ufa şəhərinə reyslər yerinə yetirməyə başlayacaq. Bakı-Ufa-Bakı istiqaməti üzrə uçuşlar həftədə iki dəfə - cümə axşamı və bazar günləri həyata keçiriləcək.
Həmçinin xatırladaq ki, “Buta Airways” aviaşirkəti iyunun 15-dən etibarən həftədə iki dəfə olmaqla Həştərxan (cümə axşamı və bazar günləri), Mineralnıye Vodı (çərşənbə axşamı və bazar günləri), Kazan (çərşənbə və şənbə günləri) şəhərlərinə uçuşlar yerinə yetirməyə başlayacaq.
“Buta Airways” aviaşirkətinin Rusiya şəhərlərinə planlaşdırılan bütün reyslərinə biletlər artıq aviadaşıyıcının akkreditə olunmuş agentliklərində, habelə aviaşirkətin “www.butaairways.az” rəsmi saytında satışdadır.
Bu reyslərə qeyd edilən daşıma şərtlərinə uyğun və qüvvədə olan epidemioloji məhdudiyyətlər şəraitində uçuşuna icazə verilən sərnişinlər qəbul ediləcək.
Rusiyaya səyahət etməyi planlaşdıran sərnişinlərə uçuşdan əvvəl, bu ölkəyə daxil olarkən qüvvədə olan qayda və məhdudiyyətlərlə tanış olmaq tövsiyə olunur. Pandemiya dövründə ölkəyə giriş qaydaları ilə aviaşirkətin saytında tanış olmaq olar: https://www.butaairways.az/az/covid/russia.

Azərbaycana giriş qaydaları haqqında məlumatla https://www.butaairways.az/az/covid/azerbaijan keçid vasitəsilə tanış olmaq olar.

Nəqliyyat 2022-06-14 17:34:00