×
A
A
A
Sazlamalar

Ağcabədi rayon sakinin elektrik cərəyanı vurması nəticəsində ölməsi ilə bağlı cinayət işi məhkəməyə göndərilib

Bakı, 14 iyun, AZƏRTAC

Ağcabədi rayon sakini 1982-ci il təvəllüdlü Ehtiram Əmirovun bu il fevralın 6-da transformatorda təmir işləri görərkən elektrik cərəyanı vurması nəticəsində ölməsi ilə bağlı Cinayət Məcəlləsinin müvafiq maddəsi ilə başlanmış cinayət işinin ibtidai istintaqı tamamlanıb.
Rayon prokurorluğunun AZƏRTAC-a daxil olan məlumatında bildirilib ki, “Azərişıq” ASC-nin Aran Regional enerji təchizatı və satışı idarəsinin Ağcabədi elektrik şəbəkəsinin satış üzrə nəzarətçi-mühəndisi vəzifəsində işləyən Bəhrəm Quliyevin həmin tarixdə saat 14 radələrində Şənlik kəndində yerləşən transformatorda baş vermiş qəza ilə əlaqədar xidməti səlahiyyətlərinin hüdudlarından açıq-aşkar surətdə kənara çıxan hərəkətlər etməklə Ağcabədi elektrik şəbəkəsinin paylayıcı şəbəkə sahəsində əvvəllər elektrik montyoru işləmiş Ehtiram Əmirova həmin transformatorun qoruyucularını təmir etməsini tapşırdığı müəyyən olunub.
E.Əmirov təmir işlərinə başlamazdan əvvəl “Mingəçevir Regional Elektrik Şəbəkəsi” MMC-nin Ağcabədi yarımstansiyasının xidməti telefonuna zəng edərək növbətçi-dispetçer Dilqəm Məmmədova transformatoru elektrik xəttindən ayırmasını bildirdiyi halda sonuncunun səhvi nəticəsində elektrik cərəyanının ötürülməsi davam etdiyindən Ehtiram Əmirov naqillərə toxunduğu anda elektrik cərəyanının vurması nəticəsində ölüb.
Bəhrəm Quliyevə Cinayət Məcəlləsinin 309.2-ci (vəzifə səlahiyyətlərini aşma, ağır nəticələrə səbəb olduqda), Dilqəm Məmmədova isə həmin Məcəllənin 314.2-ci (səhlənkarlıq, ehtiyatsızlıqdan zərərçəkmiş şəxsin ölümünə səbəb olduqda) maddəsi ilə ittiham elan olunub.
Hazırda cinayət işi baxılması üçün Lənkəran Ağır Cinayətlər Məhkəməsinə göndərilib.

Hadisə 2022-06-14 12:40:00