×
A
A
A
Sazlamalar

Mingəçevir Dövlət Universitetinin voleybol komandası Müstəqillik Gününə həsr edilən şəhər çempionatının qalibi olub

Bakı, 27 may, AZƏRTAC

Mingəçevir Dövlət Universiteti (MDU) və Mingəçevir şəhər Gənclər və İdman İdarəsinin təşkilatçılığı ilə 28 May - Müstəqillik Gününə həsr edilən idman oyunları çərçivəsində voleybol üzrə qızlar arasında şəhər çempionatı keçirilib.
AZƏRTAC xəbər verir ki, üç gün davam edən çempionatda MDU, Mingəçevir Turizm Kolleci, Mingəçevir Tibb Kollecinin tələbələri və Mingəçevir şəhər Uşaq-Gənclər İdman Şahmat Məktəbinin şagirdlərindən ibarət komandalar mübarizə aparıb. MDU-nu təmsil edən qızlardan ibarət voleybol komandası yarışın qalibi olub. Qalib komanda üzvləri kubok və diplomlarla mükafatlandırılıb.
Mayın 26-da MDU-nun rektoru Şahin Bayramov qalib komandanın üzvlərini qəbul edib. Şəhər çempionatında birincilik qazanan tələbələri təbrik edən Ş.Bayramov MDU-nu layiqincə təmsil etdiklərinə görə onlara təşəkkürünü bildirib və uğurlarının davamlı olmasını arzulayıb.
Komanda üzvləri göstərilən etimada və diqqətə görə universitet rəhbərliyinə minnətdarlıqlarını ifadə ediblər.
Qeyd edək ki, Müstəqillik Gününə həsr olunan idman oyunları şəhərdə idmanın təbliği və kütləviləşdirilməsi, gənclərin asudə vaxtlarının səmərəli təşkili və sağlam həyat tərzinin təmin edilməsi işinə töhfə məqsədilə keçirilib.

Regionlar 2022-05-27 14:49:00