Tərtər, 26 may, AZƏRTAC

Bir neçə gün aramsız yağan yağışlar nəticəsində Xaçınçaydan gələn sel suları Tərtər rayonunun Hüsənli kəndində əkin sahələrinə ziyan vurub.
AZƏRTAC-ın bölgə müxbiri xəbər verir ki, sel suları 35 hektar pambıq, 25 hektar yonca, 40 hektar arpa və buğda olmaqla, ümumilikdə, 100 hektar əkin sahəsini basıb. Rayon icra hakimiyyətinin rəhbərliyi fövqəladə hallar komissiyasının üzvləri ilə birlikdə ərazidə olub, xüsusi texnikalar vasitəsilə müxtəlif istiqamətlərdə kanallar açılaraq sel sularının yenidən Xaçınçaya axıdılması təmin edilib. Hazırda sel suları əkin sahələrindən kənarlaşdırılır.