×
A
A
A
Sazlamalar

BDU-da “Azərbaycan” qəzetinin materiallarının latın qrafikası ilə nəşrinin müzakirəsi keçirilib

Bakı, 25 may, AZƏRTAC

Mayın 25-də Bakı Dövlət Universitetində (BDU) 1918-1919-cu illərdə nəşr olunmuş “Azərbaycan” qəzetinin materiallarının latın qrafikası ilə nəşrinin müzakirəsi keçirilib.
AZƏRTAC xəbər verir ki, tədbirdə çıxış edən BDU-nun rektoru Elçin Babayev Azərbaycan Xalq Cümhuriyyətinin 23 aylıq fəaliyyəti dövründə yaşanmış əlamətdar hadisələri canlandıran “Azərbaycan” qəzetinin 20 cildlik tam külliyyatının ilk iki cildinin ölkəmizin ən nüfuzlu təhsil ocaqlarından biri - ADA Universitetinin təşəbbüsü və dəstəyi ilə işıq üzü gördüyünü qeyd edib. Bildirib ki, Azərbaycan tarixinin çox önəmli dövrünü əks etdirən və milli jurnalistikamızın formalaşmasında müstəsna xidmətləri olan “Azərbaycan” qəzetinin yenidən işıq üzü görməsi, oxuculara qayıdışı ölkəmizin ictimai və mədəni həyatında əlamətdar hadisədir: “Milli dəyərlərin təbliğində mühüm rol oynamış qəzetin ərəb əlifbasından latın qrafikalı müasir Azərbaycan əlifbasına çevrilməklə toplu şəklində geniş ictimaiyyətə təqdim edilməsi yeni reallıqda dövlətçilik tariximizin öyrənilməsində, uzun illər xalqımızdan və eləcə də elmi ictimaiyyətdən gizlədilmiş, təhrif edilmiş bir çox faktların üzə çıxarılmasında olduqca mühüm əhəmiyyət kəsb edir. Müasir dövrdə tədqiqatçıların heç də hamısının yüz il bundan öncə nəşr olunmuş dövri mətbuat nümunələrini ərəb qrafikasından oxumaq imkanlarına malik olmadığını nəzərə aldıqda ADA Universitetinin həyata keçirdiyi bu layihənin mahiyyəti və tarixi əhəmiyyəti bir daha üzə çıxır”.
Rektor vurğulayıb ki, ADA Universitetinin rektoru səfir Hafiz Paşayevin bilavasitə təşəbbüsü, gərgin əməyi, zəhməti sayəsində ərsəyə gələn bu kitablar Cümhuriyyət dövrü tariximizin yazılı abidəsi, salnaməsi kimi olduqca qiymətlidir. Bu dəyərli nəşrlər tarixçi alimlərimizə elmi araşdırmalarında əvəzolunmaz yardımçı olacaq, tədqiqatçıların stolüstü kitablarına çevriləcək. Bu mənbədən tarixçilərdən, politoloqlardan tutmuş iqtisadçılara, sosioloqlara qədər bütün tədqiqatçılar uğurla istifadə edə, onlarla dissertasiyalar, tədqiqat əsərləri yazıla bilər. Xalqımızın tarixinə xüsusi diqqət və qayğı ilə yanaşan layihə müəllifi və yaradıcı kollektiv ənənəni davam etdirmək məqsədilə I hissəsi 1882-ci ildə, II hissəsi 1888-ci ildə işıq üzü görmüş “Vətən dili” dərsliyinin də bütövlüklə, yəni hər iki hissəsi bir kitaba daxil edilməklə müasir oxucu üçün anlaşılan dildə təqdim olunmasını zəruri hesab edib və onu nəfis tərtibatda nəşr etdirib.
Elçin Babayev bu dəyərli nəşrləri ərsəyə gətirən görkəmli ictimai xadim və milli ruhlu ziyalımız Hafiz Paşayevə və yaradıcı kollektivə minnətdarlığını bildirib: “Yəqin ki bu nəşrlər yaxın gələcəkdə müxtəlif dillərə tərcümə olunaraq Azərbaycanın xarici ölkələrdə fəaliyyət göstərən səfirliklərinə, çoxsaylı diaspor təşkilatlarına təqdim ediləcək, tariximizin və mədəniyyətimizin təbliğində mühüm vasitəyə çevriləcək”.
Daha sonra çıxış edən BDU-nun Ümumi dilçilik kafedrasının müdiri, Milli Məclisin deputatı akademik Nizami Cəfərov, BDU-nun Jurnalistika fakültəsinin Milli mətbuat tarixi kafedrasının müdiri Cahangir Məmmədli, Multimedia və elektron kommunikasiya kafedrasının professoru Qulu Məhərrəmli, Tarix fakültəsinin Mənbəşünaslıq, tarixşünaslıq və metodika kafedrasının dosenti Sevinc Qasımova, Jurnalistika fakültəsinin dekanı Vüqar Əliyev çıxışlarında “Azərbaycan” qəzetinin latın qrafikası ilə nəşrinin gənc nəslin vətənpərvərlik ruhunda tərbiyəsi, tarixi, milli, ictimai-siyasi əhəmiyyəti yönündə yüksək dəyərini vurğulayıb, mətbuat tarixinin öyrənilməsi baxımından əvəzsiz mənbə olduğunu qeyd ediblər. Çıxış edənlər ADA Universiteti ilə BDU-nun əməkdaşlığını yüksək qiymətləndiriblər.

Elm və təhsil 2022-05-25 14:40:00