Azərbaycan Milli Xalça Muzeyinin direktoru Fransada mühüm görüşlər keçirib
Bakı, 24 may, AZƏRTAC
Azərbaycan Milli Xalça Muzeyinin direktoru Şirin Məlikova Fransa Mədəniyyət Nazirliyinin nəzdində fəaliyyət göstərən Dünya Mədəniyyətləri Evi – Fransa Qeyri-maddi Mədəni İrs Mərkəzinin dəvəti ilə bu ölkədə 10 günlük səfərdə olub.
Muzeydən AZƏRTAC-a bildirilib ki, qeyri-maddi mədəni irs nümunələrinin təbliğinə və mədəni müxtəlifliyin müdafiəsinə mühüm töhfələr verən bu beynəlxalq təşkilat xarici ölkələrdə çalışan və Fransa ilə mədəni əlaqələrin qurulmasında rolu olan şəxslər üçün xüsusi proqramlar təşkil edir. Azərbaycan Milli Xalça Muzeyinin son dövrlər Fransanın mədəniyyət ocaqları ilə sıx əməkdaşlığı nəzərə alınaraq, bu il ölkəmizi onun fəaliyyət sahəsinə uyğun hazırlanan xüsusi proqram çərçivəsində Şirin Məlikova təmsil edib.
Xalça Muzeyinin profilinə uyğun olaraq muzeyin direktoru Paris, Lion və Fransanın digər şəhərlərində fəaliyyət göstərən muzeylərin ekspozisiya və fondları, bərpa mərkəzləri, qədim üsulların tətbiq edildiyi dekorativ-tətbiqi sənət, tekstil mərkəzləri ilə yaxından tanış olub. Həmçinin dünyanın məşhur muzeylərindən olan Luvr muzeyinin, ən gözəl krujeva tikmə sənət əsərlərinin hazırlandığı Milli Krujeva Konservatoriyası emalatxanasının, XVII əsrdən indiyədək dünya unikal kolleksiyasının qorunub saxlandığı “Mobilier National”ın xalça, qobelen laboratoriyasının zəngin təcrübəsi haqqında maraqlı məlumatlar əldə edib.
Onların rəhbərləri, səlahiyyətli şəxsləri, o cümlədən Fransanın Mədəniyyət Nazirliyinin nümayəndələri ilə səmərəli görüşlər keçirərək qarşılıqlı əməkdaşlıq məsələlərini müzakirə ediblər. Bunlar isə gələcəkdə Azərbaycan-Fransa mədəni əlaqələrinin genişləndirilməsi, Fransa muzeyləri ilə əməkdaşlığın inkişafı və birgə layihələrin hazırlanması, icrası istiqamətində yeni imkanların yaranması baxımından vacib və əhəmiyyətlidir.
Xətai Sənət Mərkəzində “Müşahidələrin fraqmentləri” adlı fərdi sərgi açılıb
Haaqada UNESCO üzrə Azərbaycan Respublikasının Milli Komissiyasının 30 illik yubileyi qeyd edilib
Bakıda Qırğız Mədəniyyəti Günləri keçiriləcək
“Xalqın mədəni sərvəti” layihəsi çərçivəsində regionlarda növbəti konsert təşkil edilib
“BakuOperArt” “Sərhədsiz Puşkin” adlı ədəbi-musiqili layihə təqdim edir