Bakı, 21 may, AZƏRTAC

Bu gün səhər saatlarından etibarən Finlandiyaya Rusiya qazının nəqli tam dayandırılıb.
AZƏRTAC TASS agentliyinə istinadla xəbər verir ki, yanacaq tədarükünün dayandırılmasına səbəb Finlandiyanın dövlət energetika kompaniyasının (Gasum) aprel ayında nəql olunmuş qazın pulunu rublla ödəməkdən imtina etməsidir.
“Qazprom” bununla bağlı mayın 20-də “Gasum”u xəbərdar edib. Ödənişi rublla etməkdən boyun qaçıran Finlandiya kompaniyası isə öz növbəsində bildirib ki, qaz tədarükünə dair “Qazprom eksport” ilə 2031-ci ilədək qüvvədə olan kontrakt üzrə arbitraj məhkəməsinə müraciət edəcək .
2021-ci ildə “Qazprom eksport” fin kompaniyasına 1,49 milyard kubmetr qaz çatdırıb. Bu da Finlandiyanın ümumi qaz istehlakı həcminin üçdəiki hissəsini təşkil edib.