Lissabon, 20 may, AZƏRTAC

Portuqaliyanın Baş naziri Antoniu Koşta ölkəsinin ukraynalı qaçqınların qəbulu üçün Polşanın hakimiyyət orqanlarına 50 milyon avro məbləğində maddi yardım göstərəcəyini bəyan edib.
AZƏRTAC xəbər verir ki, Baş nazir Varşavada polşalı həmkarı Mateuş Moraveski ilə görüşdən sonra mətbuat konfransında çıxış edərkən ukraynalı qaçqınların qəbulunda Polşanın hakimiyyət orqanları ilə səyləri bölüşmək üçün əməkdaşlığa hazır olduqlarını bildirib. Portuqaliya hökumətinin başçısı vurğulayıb ki, ukraynalıların əksəriyyəti ölkələrinə geri qayıtmaq, yaxud mümkün qədər Ukraynaya yaxın bölgədə qalmaq istəyirlər. Ərzaq məhsullarının ixracında Ukraynanı dəstəkləmək mexanizmini tapmaq lazımdır. İndiki vəziyyət Avropaya, ilk növbədə isə Afrika ölkələrinə öz təsirini göstərir.

Nigar Cəfərli
AZƏRTAC-ın xüsusi müxbiri
Lissabon