Cenevrədə Xocalı qurbanlarının xatirəsi anılıb
Cenevrə, 27 fevral, AZƏRTAC
Azərbaycanın Cenevrədəki BMT bölməsi və digər beynəlxalq təşkilatlar yanında daimi nümayəndəliyi bir sıra ölkələrin daimi nümayəndələrinin və Azərbaycan diasporunun iştirakı ilə Xocalı soyqırımının 30 illiyinə həsr olunmuş “Ədalət, sülh və inkişaf axtarışında” adlı tədbir keçirilib.
AZƏRTAC xəbər verir ki, tədbirdə soyqırımı qurbanlarının xatirəsi bir dəqiqəlik sükutla yad edilib.
Azərbaycanın Cenevrədəki daimi nümayəndəsi, səfir Qalib İsrafilov çıxışında tədbir iştirakçılarına Azərbaycan tarixinin ən dəhşətli və faciəli səhifəsi olan Xocalı soyqırımı barədə ətraflı məlumat verib. O, Azərbaycanın 44 günlük müharibənin nəticəsində Qarabağ münaqişəsinə son qoyduğunu və münaqişədən sonrakı dövrdə regionda dayanıqlı sülhün əldə olunması istiqamətində atdığı addımlar barədə danışıb, bunun üçün Xocalı faciəsinə görə məsuliyyətin Ermənistan hakimiyyəti və ictimaiyyəti tərəfindən tanınmasının, faciə qurbanlarından üzr istənilməsinin vacibliyini qeyd edib.
Azad olunmuş torpaqlarda aparılan təmir-bərpa işləri barədə danışan səfir Azərbaycanın bu istiqamətdə qarşılaşdığı çətinliklər, minalar problemi, törədilmiş ekoloji cinayətlər və məhv edilmiş mədəni irs barədə məlumat verib.
Sonra Cenevrədə yaşayan diaspor nümayəndələri Mariya Xan-Xoyskaya və Nərgiz Ocaqverdiyeva çıxış edib, gənc diaspor fəalı Alsu Aktoprak isə Xocalı soyqırımının qurbanlarına həsr olunmuş şeir söyləyib.
Daimi nümayəndəliyin əməkdaşı Nərmin Hüseynovanın təqdimatında ölkəmizin azad olunmuş ərazilərində aparılan təmir-bərpa işlərini əks etdirən videoçarxlar nümayiş olunub.
Sonra Fransada yaşayan həmyerlimiz, məşhur piano ifaçısı Adilə Əliyeva Xocalı soyqırımının qurbanlarına həsr olunmuş piano konserti ilə çıxış edib.
Elgün Niftəli
AZƏRTAC-ın xüsusi müxbiri
Cenevrə
Xocalı soyqırımı şahidinin xatirələri holland dilində dərc olunub
Xocalı soyqırımının 32-ci ildönümü ilə bağlı ümumukrayna onlayn konfransı keçirilib
Dmitri Savelyev: Xocalı hadisələrinə soyqırımından başqa ad vermək çətindir
Xocalı faciəsi ilə əlaqədar Sloveniyanın paytaxtında maarifləndirmə aksiyası keçirilib
Parisdə “İşgəncələr məbədi - Şuşa həbsxanası” sənədli filmi nümayiş olunub VİDEO