×
A
A
A
Sazlamalar

Azərbaycan xalqı Xocalıda erməni şovinistlərinin soyqırımı siyasətinə məruz qalıb

Bakı, 25 fevral, AZƏRTAC

AMEA-nın Fəlsəfə və Sosiologiya İnstitutunda Xocalı soyqırımının 30-cu ildönümünə həsr olunmuş “Xocalıya ədalət və Şuşa Bəyannaməsinin yeni reallıqları” mövzusunda tədbir keçirilib.
Öncə Xocalı soyqırımı qurbanlarının xatirəsi bir dəqiqəlik sükutla yad edilib.
AMEA-dan AZƏRTAC-a bildirilib ki, tədbiri giriş sözü ilə açan elmi müəssisənin baş direktoru fəlsəfə elmləri doktoru, professor İlham Məmmədzadə 1992-ci il fevralın 26-da Xocalıda azərbaycanlılara qarşı törədilmiş soyqırımı cinayətlərinin dünya elmi ictimaiyyətinə davamlı çatdırılmasının vacibliyini vurğulayıb. Professor qeyd edib ki, bu məqsədlə xarici dillərdə elmi, fəlsəfi, siyasi təhlillər dərc olunmalı və beynəlxalq aləmə çatdırılmalıdır.
Fəlsəfə və Sosiologiya İnstitutunun icraçı direktoru Eynulla Mədətli bildirib ki, 1992-ci il fevralın 26-da Xocalıda azərbaycanlılara qarşı törədilmiş soyqırımı 30 ildir faciə günü kimi anırıq. Azərbaycan xalqı iki əsrə yaxındır erməni şovinistlərinin davamlı olaraq etnik təmizləmə, soyqırımı siyasətinə məruz qalıb.
Tədbirdə institutun şöbə müdiri professor Rəna Mirzəzadə, professor Rəfiqə Əzimova, fəlsəfə üzrə fəlsəfə doktoru Hüseyn İbrahimov, Asya Əhmədova və digər çıxışçılar Xocalı soyqırımının XX əsrin ən dəhşətli faciəsi olduğunu vurğulayıblar.

 

Elm və təhsil 2022-02-25 14:44:00