Bakı, 10 fevral, AZƏRTAC

İsrail Mülki Aviasiya İdarəsi “Elbit” konsernində istehsal edilmiş “Hermes Starliner” pilotsuz təyyarəyə lisenziya verib. Bu lisenziya həmin təyyarədən mülki aviasiya məkanında istifadə edilməsinə imkan verəcək.
AZƏRTAC İsrail KİV-lərinə istinadla xəbər verir ki, “Hermes” dünyada belə icazə verilmiş ilk pilotsuz uçuş aparatıdır. İndiyə qədər PUA-lardan yalnız hərbi hava məkanlarında və ya xüsusi hava dəhlizlərində istifadə edilə bilərdi.
Bu lisenziyanın alınması “Hermes-900” PUA-nın mülki versiyası olan “Starliner”in mülki bazarlarda istifadəsi üçün geniş imkanlar açır. Ondan, məsələn, yeni abadlaşdırılmış ərazilərin hava məkanında həyata keçirilən missiyalarda, kənd təsərrüfatı məsələlərinin həllində, axtarış-xilasetmə əməliyyatlarında və başqa məqsədlər üçün istifadə etmək olar.
“Elbit” konserni “Helmes Starliner” üçün İsveçrə Müdafiə Nazirliyindən və Kanada Nəqliyyat Nazirliyindən sifarişlər alıb.