×
A
A
A
Sazlamalar

“Azərbaycanda məşğulluğa dəstək” layihəsinə daha 6 min şəxs cəlb ediləcək

Bakı, 19 yanvar, AZƏRTAC

Əmək və Əhalinin Sosial Müdafiəsi Nazirliyində Dünya Bankının nümayəndələri ilə görüş olub. Ötən dövrdə Dünya Bankı ilə sosial sahədə uğurlu əməkdaşlıq təcrübəsini qeyd edən əmək və əhalinin sosial müdafiəsi naziri Sahil Babayev yeni əməkdaşlıq layihəsi olan “Azərbaycanda məşğulluğa dəstək” layihəsinin əhəmiyyətini vurğulayıb.
Nazirliyin İctimaiyyətlə əlaqələr və kommunikasiya şöbəsindən AZƏRTAC-a verilən məlumata görə, o, Prezident İlham Əliyevin tapşırığına uyğun olaraq ölkədə aktiv məşğulluq proqramları ildən-ilə genişləndirildiyini bildirib. Ötən il 16232 şəxs özünüməşğulluq proqramına cəlb olunub ki, bu da proqramın icrasına başlanıldığı 2017-ci illə müqayisədə 13,8 dəfə çoxdur. Proqramın fəaliyyət sahələrinin sayı da artaraq 44-ə çatıb.
S.Babayev nazirlik və Dünya Bankının birgə icra etdiyi “Azərbaycanda məşğulluğa dəstək” layihəsinin özünüməşğulluq proqramının genişləndirilməsi və icra mexanizminin effektivliyinin artırılmasına mühüm dəstək olduğunu deyib. O, əhalinin həssas qruplarından olan 22 min işsiz şəxsin həmin layihə üzrə istehsal və xidmət sahələri üzrə kiçik bizneslərini yaradacağını diqqətə çatdıraraq qeyd edib ki, artıq 6 mindən çox işsiz şəxs layihə üzrə biznes təlimlərə cəlb edilib. Onların 1033-ü şəhid ailəsi üzvü və müharibə iştirakçısıdır. Layihənin icrasında qadınlara və gənclərə üstünlük verilir. Layihə üzrə biznes təlimlərə cəlb edilmiş şəxslərin 1771-si qadın, 1806-sı gəncdir.
Bu il isə “Azərbaycanda məşğulluğa dəstək” layihəsinə daha 6 min şəxs cəlb edilərək kiçik biznesləri qurulacaq. Layihə iştirakçılarına aktivlərin təqdim edilməsi prosesi davam edir.
Qeyd edilib ki, layihə məşğulluq xidmətləri və proqramlarının gücləndirilməsi, xüsusi təlim modullarının hazırlanması və yenilənməsi, əmək bazarının ehtiyaclarının qiymətləndirilməsi üzrə kadr potensialının gücləndirilməsi, işaxtaranlar üçün statistik profilləşdirmə alətlərinin və bacarıqların qiymətləndirilməsi testlərinin hazırlanması və s. istiqamətlərdə də dəstək rolunu oynayır.
Görüşdə Dünya Bankının Azərbaycan üzrə ölkə meneceri Sara Maykl, sosial müdafiə üzrə baş mütəxəssisi Mirey Ovadiya, əməliyyatlar üzrə baş mütəxəssis Səidə Bağırlı və baş iqtisadçı Sirma Demir Şeker, sosial müdafiə və iş yerləri üzrə praktika meneceri Cem Mete, Dünya Bankının Azərbaycandakı ofisinin proqramlar üzrə assistenti Səbinə Quliyeva birgə layihələrin icrası işlərindən və gələcək əməkdaşlıq məsələlərindən bəhs ediblər.
“Azərbaycanda məşğulluğa dəstək” layihəsi üzrə aparılan işlərə və məşğulluq, pensiya, sosial təminat və əlillik sahələrində texniki yardım üzrə gələcək əməkdaşlıq istiqamətlərinin müəyyən edilməsinə dair müzakirələr aparılıb.

Sosial 2022-01-19 18:00:00