×
A
A
A
Sazlamalar

“Açıq mikrofon” aksiyası Əliləmbəyli kəndində keçirilib

Bakı, 23 sentyabr, AZƏRTAC

“Azəriqaz” İstehsalat Birliyinin sayca 16-cı “Açıq mikrofon” aksiyası bu dəfə Sabirabad rayonunun Əliləmbəyli kəndində baş tutub.
“Azəriqaz”dan AZƏRTAC-a bildirilib ki, sakinlərin qaz təchizatı ilə bağlı üzləşdikləri problemləri dinləmək üçün səyyar qəbul otağı onların ixtiyarında olub. Kəndin sakinləri səyyar qəbul otağının imkanlarından istifadə edərək problem və təkliflərini açıq şəkildə səsləndiriblər. Sakinlər alternativ yanacaq mənbəyi kimi odunla bağlı da problemlərinin olduğunu bildirərək təbii qazla təmin olunmalarını xahiş ediblər. Aksiyaya rayonun millət vəkili Ramin Məmmədov və Sabirabad Rayon İcra Hakimiyyətinin başçısının müavini Həsən Həsənov da qatılıb. Onlar da kənddə təbii qazın olmaması səbəbindən yerli sakinlərin qarşılaşdıqları çətinliklərdən söz açıblar. Səsləndirilən problem və təkliflər Birliyin rəhbərliyinə çatdırılacaq və müvafiq qərar veriləcək.
Qeyd edək ki, indiyədək təşkil olunan 15 aksiyanın ikisi tərəvəz istehsalı ilə məşğul olan istixana sahibləri ilə, digər 13-ü isə Bakı və Bakıətrafı qəsəbələrdə, həmçinin ayrı-ayrı regionlarda vətəndaşların iştirakı ilə keçirilib. Təşkil olunan aksiyaların hər biri müsbət istiqamətdə həllini tapıb. Səyyar qəbul otaqları mütəmadi olaraq təşkil olunacaq, problemlərin operativ həllinə xidmət edəcək.

Neft - qaz 2021-09-23 18:35:00